Ta kuminsá ku deseá tur hende un bon dia. Na momentu ku mi mira representante di gobièrnu di Kòrsou i representashon di Aeropuerto Hato ta firma akuerdo pa Kòrsou haña un base pa buelonan den espasio, mi a pensa mesora riba difuntu Juancho Evertsz, i su ekspreshon di “White Elephant” (konstrukshonnan pafó di nos realidat ekonómiko) i e “rip off” ku Sint Anna Shipyard (siendo naif a kue nos hendenan kabes abou).

****

Opviamente nos ta keda ku un aserkamentu den direkshon di kosnan “too good to be true” (den kuadro di nos realidat sosio ekonómiko nan ta irealista). En bes di atendé den un forma sistemátiko ku defisiensianan infrastruktural ku tin desaroyo di nos turismo malamente stanka, nos ta keda pèrsistí den brasamentu di kosnan ku

****

Pa di tantísimo biaha mi tin di apuntá ku gubernamentalmente nos aserkamentu ta karesé di vishon, metodologia i sentido di urgensia. Simplemente e determinashon mental pa hasi kos manera mester ta (un aserkamentu kuidadoso, ku bon trabounan analítiko, kouteloso ku pisamentu di impakto di eventual desishonnan, konforme di e reglanan vigente) no t’ei òf ta demasiado suak pa resistí, preshon di ambishon i sirkuito di gruponan di interes. Resultado: akshonamentu parotin i argumentashon den defensa di posishon “a priori”.

****

Ku awe tin inkietut denter i rondó di CTB, i ta kla pa kore apuntá otro grupo di hende na kabes, ta nada mas ku kontinuashon di akshonamentu gubernamental parotin. Ta elevá kualke “oprisping” di aktornan gustá na maneho. No tin mester di “dossier” ku ta kontené e pasonan ku a kondusí na e desishon. Den maneho parotin, tomo di desishon no ta kuidadoso ni kouteloso. Ta kende a bini ku un idea ta konta.

****

Pa buena marcha mi ke apuntá, ku aparentemente falta di plaka no ta argumento ora ku ta brasa proyektonan “too good to be true”. Ta parse ku falta di plaka ta kondusí na tendensia di halusinamentu for di kual ta surgi desishon pa brasa proyektonan “too good to be true’. Plaka, no ta argumento ora ku bo tin un bon plan. Plaka ta un instrumento i su nesesidat (“vraag”) ta ser determiná su kosto (interes). Mas mihó e plan (rendimentu riba kapital invertí) mas fásil e ta yega na finansiamentu.

****

Sin plan, plaka por lo general ta resultá den mas desgrasia. Pèrmití mi di bolbe referí na e gran katedrátiko Ludwig von Mises, ku ta utilisá e terminologia “malinvestments”, pa indiká kon rekursonan ta wòrdu konvertí den kosnan ku no tin utilidat pa e realidat di mañan (invershon ta nifiká ku bo ta krea/retené rekurso pa lokual tin di hasi den futuro). Tene tasa di interes bou di e nivel di merkado (e tasa ku dor di oferta i demanda ta keda establesé) ta krea tera fértil pa mas malinvestments.

****

Proyektonan ku rendimentu ku no ta sufisiente pa kumpli ku kosto di kapital, dor di supsidio di gobièrnu (fasilitamentu di kosnan ku ta tene e kostonan real di proyekto pafó di e kalkulashonnan) ta aparentá komo proyekto faktibel, pa despues e realidat komersial eksponé nan.

****

Pa gobernashon efektivo (“regeren is vooruitzien”) bo tin mester di hendenan ku por (i tin e disposishon mental pa hasi esaki, sin miedu pa e inevitabel riesgo di ta robes) visualisá futuro i no hendenan ku ta bai tras di halusinashon. Bo tin di hasi proyekshon a base di un determinado vishon (kon bo ta mira mundu i e posishon pa bo pais i bo mes den dje). Nos práktika ta mustra un tendensia molestioso di mira e partinan bunita i di ignorá e realidatnan duru. Te hasta ora ku tin un apresiashon válido di nos áreanan di debilidat i fortalesa, nos no tin e “besluitvaardigheid, wilskracht en daadkracht” pa hasi lokual tin di hasi. Ta skeif kos padilanti òf ta rekurí na e táktika di abestrus.

****

Kon leu a avansá den atendé ku por ehèmpel e “institutional deficiencies/weaknesses” ku por ehèmpel un IMF ta mustra riba dje kada bia? Sin kambio di mentalidat no ta yega na aseptashon ku nos no ta hasi avanse pa falta den “besluitvaardigheid, wilskracht en daadkracht”. Chin chan kos ta rekurí na keda sin presentá i forma quorum. En bes di konfrontá otro denter di koalishon i disidí kos, ta pusha kos dilanti.

****

No ta ridíkulo ku a pèrmití trahamentu di hotèl sin ku sikiera tabata tin ekspektativa hustifiká (“gerechtvaardigde vertrouwen”) den oumento di demanda? E oumento di kamber por lo demas, ta representá un oumento den kapasidat di tráfiko di hende pa kual no tin infrastruktura sufisiente òf adekuado. Bándabou, Bándariba i Banda’Meimei te ainda tin e mesun defisiensianan struktural. Mi ta keda puntra si ta realístiko pa pretendé di realisá un volúmen di tráfiko ku ta surpasá lokual nos realidat geográfiko ta brinda.

****

Miéntras no traha sistemátikamente pa atendé ku e defisiensianan konosí, tur otro pretenshon mester wòrdu interpretá komo kreamentu di persepshon eróneo ku tin progreso. Ta persepshon ku ta resultá den desepshon ora ku por ehèmpel kuponan di trabou ku presentá tin di bai pa estranhero.

****

Ta p’esei mi ta ripití, ku no ta realístiko pa fèrwagt mehoramentu den un situashon for di e mesun filosofia i ideologia ku a kondusí na e situashon. Elekshon ku ta trese kambio marginal den e repartishon di poder entre e mesun “geestverwanten” no ta resultá den e kambio den aserkamentu di gobernashon. E ta representá kambio den sentido di bienestar pa esnan ku ta partisipá den e “stoelendans”.

****

Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bon biní.