WILLEMSTAD – No tin duda ku e krímen di atrako a bolbe lanta kabes i ta sigui di ta un preokupashon den pueblo. Apesar ku algun tempu pasá a informá, ku e kantidat di atrako a baha pa loke ta inisio di 2010, últimamente, sigur den e periodo di vakashon aki atrako ta manera al órden di dia. Ayera esei tabata e kaso atrobe i e atrako ku

Tabata alrededor di 18.05’or ku Sentral di Polis a dirigí un patruya na un establesimentu na Cerito relashoná ku un atrako. For di un investigashon preliminar a resultá, ku dos hòmber ku kara tapá lo a drenta e establesimentu i bou di menasa ku arma di kandela lo a bai ku sèn i mas artíkulo for di e sitio den un outo koló blou. Siguiendo ku e investigashon, polis a haña informashon for di un suidadano atento, ku a señalá un outo koló blou koriendo ku kuater hòmber aden, ku tabata aktua sospechoso. Mesora diferente patruya polisial a kuminsá bai den direkshon di e outo i a kuminsá ku un persiguishon drentando Suffisantweg, Kaya San Juan, Stenen Koraal i a logra para e vehíkulo den Kaya Talco i konstatá  ku enbèrdat  e outo ta korespondé na e deskripshon di e outo ku e atrakadónan a usa pa hui un ratu promé. Polis mesora a detené e kuater sospechosonan aki:  G.E.B. 15 aña di edat, N.G.M. 19 aña di edat, J.C.W.  17 aña di edat, J.C.A.V.O 18 aña di edat.

Tambe polis a konfiská den e outo: un “rugtas” blanku ku un kantidat di plaka kèsh, un pistol i un kantidat di paña. Tambe polis a konfiská kuater telefon probablemente prosedente di e atrako.

E telefon nan a ser hañá den un mondi den serkania di Kaya Talco kaminda polis a detené e kuater sospechosonan. Investigashon ta kontinuá, pero polisnan ta sumamente agradesido na e tep ku nan a risibí serka e suidadano i ku por a yega na un solushon asina rápido di e kaso aki. Awor e kuater hóbennan aki mester bai duna kuenta i rason i mas importante ainda no por sigui kometé nan fechorianan mas.