Lorito ta yama tur hende un felis dia. Awe ta djaweps i den mondi ta masha flùitmentu di alegria tabatin awe. Lorito no sa si esei tin di aber ku e fecha di luna òf por ta ku tin mas awa pa bebe. Probablemente ta un kombinashon di e dos faktornan aki.

*********

Lorito a tuma nota ku silensiosamente mas i mas hóben dia pa dia di edat hóben, ta kai den gara di hus

*********

Ora bo mira e hóbennan den korant, bo kurason ta dal duru sera. Ta esaki ta e futuro habitantenan di e KAS? Danki Dios pa historia, Lorito ta un di e pokonan ku a señalá (huntu ku Maria Liberia) ku por traha kua kas ku bo ke, pero si no bo traha riba desaroyo di hende bo ta keda mesun leu. Monseñor Amado, unda bo ta? Unda bo herensia ta?

*********

Masha diskushon e hendenan di LA PRENSA a generá atrobe ku e artíkulo riba e manera ku ta atendé ku bandanan di Kòrsou na Aruba. Anto e siguiente dia: ata Tsunami ta bin Kòrsou (atrobe). Nada kontra.  Pero e asuntu aki di trato igual ta un kos ku mester kaba di atendé. Korektamente manera LA PRENSA a skibi, no por ta asina ku konstantemente tin sunchimentu i brasamentu ta tumando lugá i no tin kurashi pa atendé e punto importante aki. Man na obra!

*********

Lorito a tende, ku un radio awe mainta den Goede Hoop a laga nos Min. Pres. plantiá! Lorito a tende ku e mandatario a traha un sita for di siman pasá pa un entrevista awe na e radio. Ora el a yega, nan a bis’é ku nan no tabata kòrda i nan tabatin un otro hende, por sierto un otro dama no-polítiko den studio. E kaso a demostrá, ku radionan mester planiá nan kosnan mas mihó. Lorito a bisa, kiko lo a pasa na Merka si Barack Obama a yega na e programa “The View” i nan a bis’é ku e sita no por sigui pasobra nan a lubida i ku un di e bat-boynan di Yankees ta den studio. Lebumai nos!

*********

Lorito a tende, ku na diferente pais nan a pone un regla ku tur hende ku a bai Sur-Afrika mester mèldu na outoridatnan di sanidat. Aparentemente esei tin di aber ku kasonan di sende paga i sarampi ku a detektá for di hendenan ku a bai e kampionato mundial di futbòl. Un hende ku a kaba di yega for di Mexico a bisa nos, ku na entrada di tur aeropuerto tambe nan a pone un bòrchi. Na Sint Maarten tambe nan a pidi tur hende ku a bai Mundial mèldu. Na Kòrsou so, tur hende ta kana liber ainda. Ta meskos ku e asuntu di dengue. A sinta drumi i ta ora LA PRENSA a kuestioná e situashon, a kore anunsiá ku e kaso tin atenshon. Sigui drumi numa!

*********

Papiando di enfermedat, ta masha kos tabatin ku e asuntu di grip di porko ku a  sakudí mundu. A bisa e tempu ei, ku ta e kompania di remedi kier a bira riku i ku a krea pániko innesesario. Awor ta resultá ku en bèrdat esei tabata e kaso. Anto e remedinan ku a kumpra awor? Bo sa kaba ku nan fecha a vense i ku e invershon a bai pèrdí. Ulanda a kaba di eliminá tur su pulchinan. Aki nan si nos no sa kiko a pasa ku nan. Minister por informá nos kiko a pasa ku tur e tamiflunan ku a yega aki? Danki Dios, nos no tabatin nodi di paga. Te mañan ku Dios su poder!