Kralendijk- Partido pro Hustisia & Union (PHU) ta orguyoso ku otro partido a kuminsá kopia su ideanan. Esei no ta niun problema. Kopia bai numa. Lo mas importante ta ku Boneiru ta progresá. Idea no ta di hende. Si nan ta bon, nan ta un bendisho

Kombiná ekonomia ku ekologia    

PHU ta sali for di e punto di bista ku tantu ekonomia komo ekologia ta importante. Ta p’esei PHU lo stimulá lantamentu di un kompania privá pa presentá i ehekutá solushonnan ekológiko pa perkurá ku kualkier daño hasí na Naturalesa pa motibu di desaroyo ekonómiko lo wòrdu minimalisá òf asta remediá kompletamente. E kompania aki ta diferente di organisashonnan manera STINAPA dor ku e tin ‘winstoogmerk’ (= fin di lukro), es desir su meta lo ta pa hasi ganashi ku e trabou ekológiko aki.  

Gobièrnu mes lo ta akshonista minoritario. Akshonista mayoritario lo ta e trahadónan di e kompania huntu ku un invershonista profeshonal. Management lo ta den man di sektor privá (es desir, akshonistanan lo nòmbra management). Si partido Demokrat no tin niun solushon pa Landfill promé ku elekshon na mart 2011, PHU lo kombiná aktividat di e kompania aki ku trabou di prosesamentu di sushi na Landfill. E ta posibel ku Selibon por hunga un papel den esaki tambe.

Tin solushon pa tur kos. Ta tempu pa un kambio profundo den polítika Boneriano.