Ta kuminsá ku deseá un i tur un bon dia. Direktiva di un partido semper mester akshoná ku e fin (pues den kuadro di e kousa sosial) den mente. Na okashon, dirigentenan por kai den un turmulina di akshon reakshonario, kaminda nan no tin e fin, pero ékis ophetivo di término korto den mente. Nan ta kore e riesgo ku tempu ta move, sirkunstansia ta kambia, lagando nan pafó di onda. Na Kòrsou, e mayoria di partido polítiko, a bini ta akshoná sin muchu konotashon ku nan kousa sosial.

****

Un organisashon ku no ta den kuadro di su kousa sosial, por optené éksito okashonal, pero pasobra e ta funshonando a base di puru oportunismo (éksito ta sirbi komo faktor ku ta tene miembronan huntu) ta pone kontinuidat di e organisashon na peliger. Oportuni

****

Manera mi a skirbi den e kolumna di ayera, e reposishonamentu di MAN, kaminda MAN ta brasa su kousa sosial atrobe (ku ta pone hustisia sosial den sentro), ta kibra e impase di poder polítiko di 52-48%. Ku su tumamentu di distansia for di e rivalidat (infermiso) ku a desaroyá durante dje proseso estatal, MAN ta konfrontá resistensia serka sierto parti dje blòki di fasilitadornan polítiko (fanatikada ferviente) i ta inisialmente vulnerabel serka algun den e blòki di mobilisadornan no polítiko (kambio semper ta provoká kuestionamentu) i tal bes algun rival polítiko.

****

Pero den e blòki mas signifikante ku ta elektorado, e echo ku e perspektivanan di MAN komo parti di gobernashon (“the day after elections” tin MAN komo opshon grandi atrobe) a amplia, ta hasi e profilamentu di MAN mas efektivo (den kuadro di pone MAN komo influensia riba gobernashon). En bes ku rivalidat riba algu ku no ta biba serka e masa tin e peso den akshonamentu di kampaña, MAN por entretené asuntunan ku e masa ta identifiká komo nan “issue”.

****

Den kuadro di e realidat di e “the day after elections”, MFK meskos ku PS ta virtualmente ekskluí komo probabel partner di koalishon. E posishonamentu basta radikal di PS, ku atakenan basta direkto i personifiká ta hinka PS por lo pronto den aislamentu. MFK su problema ta un kestion di kredibilidat i konfiansa serka ámbos partido den e kategoria di poder polítiko establesé. Ni MAN, ni PAR lo no deseá di forma un koalishon ku MFK. Semehante asosiashon riba término korto ta provoká inkietut interno.

****

Bo ta haña un situashon paresido na esun ulandes kaminda PVV a krese enormemente, pero ta konfrontá ku e realidat ku e tin di bira potensia di gobernashon pa mantené posishon (evitá e mesun desenlase ku SP tabata tin despues di maniobrá nan mes for di koalishon). VVD i CDA ta sinta ku un problema di inkietut interno pa traha ku PVV (ta konsekuensia di kiebro di Geert Wilders ku VVD).

****

Siguiendo e komparashon ku polítika ulandes, por bisa ku mando di MAN a evitá e mesun “patstelling” entre PVDA i VVD (e dos potensianan gubernamental establesé despues di elekshon) dor di tuma distansia dje rivalidat insólito ku a surgi den e proseso estatal.

****

Pa buena marcha mi ke aklará, ku no ta kestion di kambio di posishon riba e tema estatal ta na órden, pero kestion di fiha posishon ku bista riba futuro. Ami ta strategista i semper bai bo tin ku “move on” i no keda pegá ku bista atras. Lokual polítikamente si ta keda na órden ta ku ora ku e tema presentá, por ehèmpel den un evaluashon di e proseso di tomo di desishon (manera por ehèmpel a tuma lugá na Ulanda riba e partisipashon di Ulanda na e guera na Irak i Afghanistan), e posishonnan tumá riba e tema. Tardi òf trempan lo yega e momentu ku ékis asuntu ta provoká un evaluashon di tomo di desishon i ehekushon di desishon (“beleidsvoorbereiding, beslissing en uitvoering’).

****

Pa lokual ta presuntu “electoral fraud” mi ke apuntá ku hustamente e posishonamentu den kuadro dje kampaña elektoral ta duna kalke partisipashon di MAN den eventual koalishon legitimidat demokrátiko. Presensia prominente di Kenneth Gijsbertha riba e lista di MAN ta duna indikashon di un preparashon serio riba e movida stratégiko ku MAN a hasi. Kenneth Gijsbertha ta un komunikador sumamente hábil.

****

Kon elektorado lo reakshoná riba e profilamentu di MAN lo ta mas un kestion di mobilisashon, abilidat den kontakto personal i disiplina stratégiko. Den un kampaña kòrtiku, mobilisashon bon planifiká ta mas efektivo ku frekuensia i intensidat di mensahenan polítiko. E tendensia pa oumentá e frekuensia i intensidat ta reflehá un aserkamentu poko rashonal. Semper bai bo tin ku evitá “overkill” i ku asina tantu partido den kontienda, e probabilidat ku konhuntamente nan ta krea resistensia kontra e totalidat di mensahe polítiko ta grandi.

****

Pa bini bèk riba e proyekshonnan elektoral, mi ta kere ku a ménos ku surgi algu ku ta sirbi komo un “triggering effect” ku ta provoká iritashonnan bou dje kueru di e masa (inkomodidatnan ku e propio aktor mes ta ignorá inkonsientemente) PAR lo no keda muchu leu di e 9 asientonan ku ekstrapolashon di e resultado elektoral anterior ta duna. Miéntras e posishon di poder di un organisashon no mustra flakesa, no ta bini abandono supstansial.

****

Mi no ta mira tampoko ku tin algu a base di kual PAR por “claim” un kresementu ku ta meritá 11 asiento òf mas. Pues PAR segun mi (si e situashon keda manera e ta, pues sin un ola emoshonal bou dje masa) lo por saka entre 8 pa 10 asiento. Asistensia na urna lo hasi sierto impakto. E elekshon ta unu provoká i hende tin e tendensia di kansa (sigur ora ku no tin un di nan “issue’ nan).

****

Manera por a tuma nota, mi ta mira e próksimo elekshon unu ku sin no presentá un ola emoshonal bou di e masa lo ta prinsipalmente un redistribushon den e votadornan establesé (PAR, MAN, PS, FOL, PNP,DP) na fabor di PAR, MAN i PS banda di un alokashon dje votadónan hóben ku PAIS i MFK den papel prominente.

****

Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bon biní.