Lorito ta yama tur hende un felis djarason. Awa a kai awe i den mondi nos paranan ta kontentu atrobe. E otro animalnan tambe tabata grita di alegria, prinsipalmente Shon Yuana ku no mester bai kaya pa buska awa pa awor aki. Meteo a bisa ku awa lo sigui kai tambe. Dushi yu!!

*********

Tur kamind

*********

Di otro banda hopi alegria pa hazaña di nos hóbennan den eksterior riba tereno di deporte. Lorito a bisa mil i un bes i nos ta ripitié: deporte ta nos salbashon. Lorito tin gana di ta minister di Deporte, maske ta 6 luna pa demostrá ku por kita hopi hóben for di kaya, duna nan un mentalidat positivo, paga instruktornan i sòru pa esnan ku ta ekselente haña nan oportunidat sea individualmente òf kolektivamente. Awor aki ta “pappen en nat houden”, sin vishon, sin maneho i sin ambishon! Ban wak si e próksimo Minister di Deporte (di pais Kòrsou) tin mas aden!

*********

(foto lorito)

Un pabien na Churandy ku a resultá e hòmber mas velos na Weganan Sentro-Amerikano i di Karibe. Tin un kaminda largu pa bai ainda, konsiderando e tempunan ku a marka (ounke tabatin rèkòrt) pero na nivel mundial e tempunan ta hopi mas abou ainda. Pero Churandy ta riba e bon kaminda sigur, na tòp di su bida atlétiko i den bon forma. Si e kuida, e por bai duna bon bataya. Nos ta pendiente pa sa ken ta bai claim e éksitonan di Churandy polítikamente! Ken ta promé?

*********

Tin un kos ku Lorito no ta komprondé. Ta tuma medida den prizòn, ta bisa ku prezunan no por yama mas i tòg un programa na radio ta aseptá yamada di un prezu. Sea e programa aki ta di mala fe, òf e kier krea anarkia. I ta pa e hendenan aki nos mester bai vota? E kos ku mester a hasi ta pa bisa e prezu ku e no por tin telefòn te pa e yama na e radio: aki nò! Pero ta lag’é papia, pasobra ta kumbiní polítikamente!

*********

Anto riba e kosnan ku mester papia mes riba nan no ta menshoná apsoltamente nada. Nos ta pendiente di e promé komentario di e mesun programa riba e biahe pa Cuba. Aki nan si no ta bisando nada. Si tabata otro partido, hesus lo tabatin menshon di “gate” dia aden, dia afó. Nos ta keda insistí: tin mentenan ku ta realmente selektivo! Di Tili si, di tala nò! Lebumai nos!

*********

Masha hende krepchi den e dianan. Kiko bo bisa nan ta interpretá malu. Den tempu di kampana mester tene masha kuidou, pasobra tin un otro kos mas ku nan ta yama bisa: nos mes no a tende òf lesa pero.....Nos konseho ta pa bo mes tende mas i lesa promé i despues yama. Semper nos ta dispuesto pa atendé tur hende, basta bo mes a tuma e molèster di tende òf lesa i “niet van horen zeggen of horen horen”.

*********

Un saludo pa tur esnan tenchi largu den e dianan aki. Por sierto ku den mondi tin yen. Anto si bo no trapa riba nan tenchi mes, nan ta saka e tenchi pa bo trapa riba dje. Ta kon por? Te mañan ku Dios su poder!