Dia 20 di yüli último e delegashon di Kòrsou a sali pa partisipá na e sertámen di Miss i Mister Turismo Intercontinental 2010 den 7 kategoria na Repúblika Dominikana. Na tur tabatin 45 partisipante for di Europa, Afrika, Caribe, Sur Amérika i Merka ku a kompetí. Pa Kòrsou e señoritanan Lusaira Benita, Michelika Gonzalez i e hóben Terrance Pinedoe tabata esnan ku bou di preparashon di e talentoso hóben entrenadó Davin Rosa a sa di saka kara di Kòrsou ganando no ménos ku 6 premio.

Manera presidente di Curaçao Beauty Pageant Agency sr. Aldino Schoop a premirá i primintí ku su kandidata den representashon di Kòrsou sigur lo bini ku vários premio debí na e esfuerso, empeño, eksperensia den e arte aki, bon treinen i preparashon ku e mes i hinter su tim a duna na e talentoso hóbennan aki. Direktor artístiko i entrenadó prinsipal sr. Davin Rosa a hasi un tremendo trabou tantu den treinen komo den mayoria di e trahe nan ku a keda prepará pa e partisipantenan.

Na Repúblika Dominikana e delegashon di Kòrsou a bishitá un kas di wèrfano di muchanan ku H.I.V. den kuadro di trabounan karitativo kaminda nos partisipantenan a entregá  ko’i hunga, mangel i paña na e instituto aki na e madre superior ku a keda hopi gradesí i kontentu. Tambe nan a hasi bishita serka e ministerio di Turismo kual ta un identidat gubernamental den kuadro di Turismo.

Michelika Gonzalez a gana e premio di Reina Intercontinental del Merengue 2010 kual ta un premio espesial ku ta dun’é e oportunidat di representá Repúblika Dominikana den eksterior na un otro sertámen Kultural.

Lusaira Benita a gana e titulo prinsipal di Miss Petit Turismo Intercontinental 2010 kual ta pa partisipantenan mayor di edat ku un estatura kòrtiku. Tambe el a gana den e preliminar nan e titulo di Best Top Model of the year 2010 i unánimamente indiskutibel Lusaira a sa di bai ku e premio Mejor Projeccion Turístico kual ta kaminda bo ta bende bo pais turístikamente pa medio di un spich.

Terrance Pinedoe e hóben talentoso maskulino a gana e titulo di Mister Folklor Intercontinental ku e mihó trahe típiko diseñá i traha pa Davin Rosa. Tambe el a sa den e anochi final di bai ku e premio di Mister Antillas Intercontinental 2010.

Mayornan di e hóbennan aki por ta orguyoso ku e logronan internashonal aki di nan yunan ku a wòrdu hopi bon prepará pa e profeshonalnan di Curaçao Beauty Pageant Agency. C.B.P.A. den su afan pa motivá, forma i promové hóben riba e área di Beyesa, Arte i Kultura ta spera di por sigui hasi esaki i kier a yama danki spesial na Ofisina di Turismo den persona di Evita Nita i sr. Herenveen di Insel Air ku a hasi posibel pa henter e delegashon por a bai Santo Domingo i asina buta nòmber di nos isla na laira.

Por último direktiva di C.B.P.A. kier a invitá tur hóben di Kòrsou ku tambe ke haña e oportunidat di representá Kòrsou den eksterior otro aña pa inskribí for di awor pa e sertámen nashonal di Miss i Mister Turismo Kòrsou ku lo ta bai ta den fin di aña. Por yama na 5172645 òf 5156560 pa bo haña mas informashon i inskribí.