E famianan tabata basta indigná pa e motibu ku minister di Hustisia ke limitá nan pa solamente 10 minüt pa siman di por tin kontakto telefóniko ku nan famia ku ta enkarselá den prizòn Bon Futuro. Partido Frente Obrero ta di opinion, ku hopi di e detenidonan a kousa komunidat daño di un òf otro manera, pero a base di humanidat i ku e hende mester ta pará sentral tur ora, no ku palabra so, pero ku hecho i ku esaki(nan) no mester wòrdu kastigá mas ku un biaha pa su delito kometé. Partido Frente Obrero ta di opinion, ku kada detenido, ora e kaba di sinta su straf mester por regresá den komunidat, wòrdu aseptá, haña un trabou i/o kobra ònderstant. Partido Frente Obrero ta di opinion, ku e intenshon di e medida anunsiá dor di minister di Hustisia por trese atrobe intrankilidat sin ta nesesario den prizòn Bon Futuro i ta alertá pa esaki wòrdu evitá! Partido Frente Obrero a base di tur lokual ta deskribí ariba ta pidi minister di Hustisia pa reevaluá su desishon kaminda prezunan por hasi yamada telefóniko solamente 10 minüt pa siman. Partido Frente Obrero konosiendo e aktual minister di Hustisia, ta sigur ku e ta duna oido mesora na nos petishon hasi na nòmber di famia di e detenidonan i tambe di e personal di prizòn ku ta traha diariamente ku e detenidonan”, asina e partido ta bisa.