WILLEMSTAD – Lider polítiko di MAN i di dos riba lista di e partido pa e próksimo elekshon Charles Cooper kier sa, di kon Sint Maarten si a hinka klóusulanan kontra korupshon di mandatario/parlamentario den su Argelo di Konstitushon i no por hasi mesun kos pa Pais Kòrsou.  “Ta dos Pais nobo ta bai nase di kua esun si ta bisa por i ta hasié i otro no”, asina Cooper

E ta pidi pa pone atenshon prinsipalmente na artíkulo 35 (Ministers) i 50 (Parlamentslid). Einan bo ta mira ku St. Maarten si a kaba di aprobá ku den su pais nobo,  no tin lugá pa un konvikto (i hasta sospechoso) keda sinta den funshon di minister òf Parlamentu. E ta ser di schors. Punto. Anto, wak kon den e Memorie van Toelichting nan ta deskribí i defendé di kon nan si ta schors un minister òf un Parlamentslid for di ora e ta den voorlopige hechtenis pues for di ora e ta sospechoso. Anto aki na Kòrsou PAR i konsorsio ta kana bisa ku no por, ku ta violá derecho humano,  ku Ulanda a bisa St. Maarten pa sak’é.  Ta simplemente un argumentu fofo ku no tin base.  Aki na Kòrsou PAR/PNP/FOL no ke ni papia over di schorsing mes.  No tin ningun schorsing reglá ni den e supuesto Landsverordening ku nan ke bini kuné. Mi ta sugerí boso komo prensa (humildemente) pa kuestioná gobièrnu di Kòrsou riba e asuntu aki.  Pasobra ta dos mesun pais ta bai nase i bo ta mira ku den e Areglo di Estado di St. Maarten SI nan ta para pa integridat di nan instituto gobièrnu i Parlamentu  i aki na Kòrsou nan NO ta para pa integridat di instituto Gobièrnu i Parlamentu den e Kòrsou nobo”, asina Cooper ta bisa.

Mas aleu Cooper ta bisa, ku ta p’esei awor ku PAR/PNP/FOL  sa ku St. Maarten a demostrá ku por i a brongosá nan kara,  espesialmente PAR a kambia strategia i bin bisa ku si trese kambio ta peligrá 10-10-10. “Otro “kolder” manera na ulandes nan ta bisa. Awor ke trese e téknika di hinka miedu/spantu den komunidat. Pues aparentemente pueblo no tin mag di tin un Areglo di Estado na drechi kaminda ta salbaguardiá integridat di su institutonan”, asina e dirigente polítiko ta bisa.

Cooper a bisa finalmente, ku en todo kaso nos di MAN ta di opinion ku e siguiente puntonan ku pueblo ta sklama p’e,  mester ta den su Areglo di Estado:

1.            Un Parlamentario òf mandatario ku keda kondená pa Wes for di promé instansia pa motibu di kometé aktonan di korupshon kontra pueblo mester keda di schors mesora.

2.            Tur rikesanan natural ku tin den supsuela di Pais Kòrsou i su awanan teritorial ta di pueblo di Kòrsou i tur benefisio ku esakinan trese mester ta pa pueblo di Kòrsou.

3.            Tur playa i parke natural mester keda liber i aksesibel pa pueblo di Kòrsou.

“Esaki nan, si pueblo duna nos e konfiansa,  nos lo hinka nan den pueblo su Areglo di Estado”, asina Cooper a bisa finalmente.