Ta kuminsá ku deseá un i tur un bon dia. Pa mi e proyekshon final ku ékis enkuesta òf konklushon di un determinado persona ta ménos relevante pa hasi  opservashonnan riba dje. Mas interesante ta e suposishonnan ku e aktor ta sali for di dje (i dikon e ta kere ku nan ta válido i relevante), e kuadro den kual e ta mira nan (e simplifikashon di realidat ku e ta utilisá) i eventualmente e fórmula ku e ta utilisá pa hasi e kalkulashonnan.

****

Mi a apuntá na algun okashon kaba ku tur sondeo ta brinda informashon, kontal ku e método ku a apliká ta konosí. Na momentu ku e mesun método wòrdu usá i un seri di resultado ta konosí, por mira un tendensia ku irespekto e kalidat di e método utilisá ta brinda informasho

****

Un promé opservashon ku mi ke hasi riba proyekshon di resultado elektoral ku tin PAR ku 6, MAN ku 5 i MFK (e partido di Gerrit Schotte) ku 4, PS 4, DP 1 i PNP ku 1 asiento, ta ku e proyekshon ta sugerí un kambio basta serio riba e situashon di impase (52 versus 48%) entre esnan ku PAR (PAR mes, PNP i FOL) i e otronan ku e último ekspreshonnan elektoral i referèndem a mustra.

****

Si ekstrapola e resultado dje último elekshon, PAR lo tabatin 9 asiento den Konseho Insular. Un proyekshon di 6 asiento ta impliká ku PAR lo mester kai ku 3 asiento (mi a apuntá ku mi no a mira nada pa konkluí ku e posishon di PAR a debilitá). Lokual si mi ta keda riba dje ta ku por surgi un insidente/asuntu ku komo “triggering effect” por provoká un ola ku por kousa un implodamentu den e poder evidente ku PAR ta representá. E riesgo mas grandi pa PAR ta keda PAR mes.

****

Un otro opservashon ku mi ke hasi ta ku un ekstrapolashon di e resultado di MAN (koregí ku e salida di Gerrit Schotte) ta duna MAN 5 asiento i MFK di Gerrit Schotte 3 asiento. Pero mi ke mustra ku e ekstrapolashon ta benefisiá MFK mas ku MAN, miéntras mi ta duda ku tur esnan ku a vota pa Gerrit Schotte riba lista di MAN lo vota pa Gerrit Schotte riba su mes lista di MFK. Por lo demas MAN ta den e kategoria stratégiko ku por defendé posishon, meskos ku ta e kaso ku PAR, miéntras MFK, ounke ku sierto bentaha riba e otro partidonan nobo tin ku establesé su mes.

****

Ku partido PAIS di Alex Rosaria MBA den e kontienda elektoral, e grupo ku Gerrit Schotte a “target” tempu e tabata riba lista di MAN, ta haña un alternativa basta serio. Pues mi ta inkliná pa konsiderá ku MAN lo por defendé un posishon di 5 asiento, pero ta ménos inkliná pa mira MFK establesé su mes komo un poder polítiko di 4 asiento. Ku PS di Helmin Wiels por alkansá 4 asiento saliendo for di un posishon di defensa di 3 asiento ta mas probabel.  

****

E posishon di PAR ta unu fuerte di 9 asiento pa defendé (ekstrapolando e resultadonan resien). Pues drentando e kontienda elektoral sumamente kòrtiku aki (ku riesgo ku bo no por rekuperá di fayo), PAR, si e kuida su mes kontra di arogansia, ta esun ku sierto bentaha stratégiko, ku ta pone mi pensa ku si no surgi ningun insidente ku ta sirbi komo “triggering effect”, PAR lo mantené su posishon di poder polítiko. Kresementu te na 11 asiento no ta parse mi probabel (e ta keda posibel si).

****

Apesar ku PNP a saka un asiento i FOL a keda sin representashon den Parlamento antiano, FOL tin e bentaha stratégiko di karteranan ku diputado Anthony Godett por utilisá masha bon. Ta bini aserka ku PNP su sede ta den un área kaminda FOL tin mas dominio teritorial. PNP su probabilidat di pèrdè mas tereno elektoral ta mes grandi (- pa PNP) ku di FOL pa rekuperá tereno (+ pa FOL). Miéntras PNP tin kartera pa bende notisia negativo òf polémiko (sekshon di kuido, CEMS, Hospital, kosto energétiko), FOL tin infrastruktura.

****

Pa DP ta keda e pregunta kon nan ta bai por lo muy ménos dupliká e resultado elektoral anterior pa yega na e 4,67 porshento ku ta garantisá un asiento. Ta p’esei mi ta konsiderá ku un asiento pa FOL mas probabel ku unu pa DP. DP no ta disponé di e instrumentonan pa rekuperá tereno ku PAR a okupá den áreanan ku tabata DP. E mobilisashon bini kas bèk aki aya a resultá den retaliamentu kontundente di parti di PAR. Pues si no bini un ola ku impakto elektoral, PAR ta mantené tereno okupá.

****

Ta bon pa realisá ku kalke mobilisashon den kuadro dje impase di grupo ku PAR i kontra di PAR ta kumbiní PAR (52 kontra di 48%), ku e fragmentashon den e grupo kontra di PAR enbèrdat ta kumbiní PAR, ku despues ku e trayekto estatal a yega su fin, no tin nada pa kampañá kuné. Tur “status quo” ta faboresé PAR. E posishonamentu di MAN, de facto, kon desapuntante ku e por aparentá serka esnan ku ta inkómodo ku e proseso estatal, ta un bon desishon stratégiko.

****

Mester rekonosé ku e promé pa posishoná su mes den e planteamentu stratégiko aki ta Alex Rosaria MBA, ku su yamamentu pa traha pa e Kòrsou despues di 10-10-10. Pa PAIS e pregunta ta keda si e por establesé su mes (saka por lo ménos un asiento). Aki mi ke apuntá ku tantu MFK di Gerrit Schotte komo PAIS di Alex Rosaria MBA ta “target” e reglon di hóben votadó ku no ta aroyá pa e presensia di respektivamente PAR i MAN. Miéntras MFK tin di dependé di Gerrit Schotte su presensia, PAIS tin miembro di e “niche” riba lista.

****

E grupo di votadornan hóben entre kual esnan ku ta sigui òf a kaba sierto grado di formashon avansá ta bai determiná éksito di PAIS. Tin kestion di sinti bo mes representá i aki un mobilisashon polítiko nobo, manera PAIS ta sirbi komo un mihó instrumento ku esnan establesé kaba òf reagrupá bou di un nòmber nobo manera ta e kaso ku MFK.

****

Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bon biní.