Lorito ta yama tur hende un felis djamars. Asina nos ta tirando otro luna nos tras. Den mondi paranan ta sklama, pasobra ta hopi kalor. Den kaya hende ta sklama, pasobra ta kalor. Lorito a komprondé ku hasta piskánan ta sklamando, pasobra ta demasiado kalor. Ta kon ta hasi?

****

Lorito ta bai presentá e idea pa bin un mausoleo pa e indjannan ku a masakrá na Kòrsou. Komo ku awe

****

Masha komentario tabatin riba e PIN ku Gerrit a pone den korant. Den mondi paranan no tabata sa ta kiko. Nan a keda puntra otro bai bin ta kiko e kos ei ta. No a logra Lorito splika, pasobra nan no tabata komprondé e materia. Ta e mesun paranan ku tabata di akuerdo pa bai vota ku pòtlot kòrá i papel sin sa kiko ta pasando. Nan a tende algun dirigente grita i nan no a buska drechi nan mes. Nan a kuminsá na bisa: ta bon!

****

Nos a gosa masha ku e eksperto di good governance i transparensia ku awor a bira Rector na UNA a bisa Extra ku e no tin komentario riba e situashon finansiero di UNA ku no por a paga salarionan na tempu e luna aki. E kaso aki a keda serka nos komo un ehèmpel klásiko di promové un kos den públiko, pero ora bo mes ta na e posishon bo no ta duna boka. No lubidá ku UNA ta di pueblo (nos sèn di belasting) i nos tin derechi di sa kiko ta kiko. Good governance i transparensia ta konta pa UNA tambe. Sans rancune!

****

Ai, diputado Dav ta den eksterior atrobe. Awe na su ofisina den mal tono nan a bisa nos ku e no tei. Ta kiko nos a hasi nan anto? Kampaña ta den full-swing i un lider polítiko ta bai afó. Ta rabia mes e lo rabia atrobe, pero nos no tin ku nes. Bon voyage i baila hopi merengue!

****

Anto Diputado Nini tambe ta rabiá te ku e no a presentá pa forma quorum pa e reunion di ayera. Awor nos kier bisa diputado Nini, nos bon amigu, un kos: Ta djis Gobièrnu ta bai kas. No tin nodi di sapatiá mas, pasobra si Gobièrnu kai òf laga di kai, ta djis tin elekshon. Anto Lorito a tende kaba ku tin partido tra’i porta ta kla pa duna sosten pa forma quorum! Di kon sapatiá anto!

****

Diputado Marilyn, di su banda, no por a bai Ulanda mas. Parse ku partido a bis’é bon kla ku den e situashon aktual, laga otro hende bai atendé ku studiantenan. Lorito no sa masha bon ainda si e asuntu di Cuba ta fresku den memoria di partido ainda! Ta poko dia diputado Marilyn tabata na Cuba, awor ta Ulanda. Diputado Dav tabata na Cuba, awor na Santo Domingo i asina e biahenan ta sigui. Mihó biaha awor aki purá, pasobra despues di dia 27 di ougùstùs ta otro hende ta batiendo na porta pa biaha!

****

Nos a sigui e loke CBO di Aubrey a pasa aden den último dianan. Lorito a bisa na mas okashon ku nos prioridatnan no ta bon definí. Nos ta hinka yen di sèn den yen di kos ku no tin sentido ni benefisio, pero ora kosnan ta konta, nos no tei. Danki Dios algun alma a disidí ku mester skapa kara di Kòrsou i nos reputashon internashonal i nan a duna un man. Nos a buska tur manera pa sa ta kon a yuda, pero sin éksito. Awe den dia nos lo bula bai pa nos haña sa kiko ta kiko.

****

Un astrólogo a splika nos ku awe ta un bon dia si bo kier tuma kualke akshon drástiko den bo bida. Planetanan ta bon posishoná awe pa tuma kualke desishon positivo den bo bida. Segun e astrólogo ta kada pasa tantu tempu e kos aki ta presentá. Ke men, segun el a rekomendá, hasi bon uso di e posibilidat aki. Te mañan ku Dios su poder.