WILLEMSTAD -  Nada no tin mag di bai robes ora ku Financial Action Task Force, FATF,  evaluá Antia (Kòrsou i Sint Maarten) riba labamentu di  plaka i finansiamentu di terorismo. Ta p’esei Meldpunt Ongebruikelijk Transacites (MOT) na un manera hopi intensivo ta informá i instruí e sektornan ku tin obligashon di raportá. Kenneth Dambruck, hefe di MOT a bisa LA PRENSA, ku ta posibel ku tantu e sektornan ku ya kaba tin e obligashon pa raportá komo e sektornan nobo por risibí bishita dje funshonarionan di FATF. Ta p’esei ta importante pa e grupo nobo di sektor ku mester raportá transakshonnan no-usual tambe ta bon informá. 

Grupo nobo 

Pa por señalá un transakshon komo no usual, mester usa sierto indikadó ku ta ophetivo i suphetivo. Despues di un análisis profundo ku MOT ta hasi, por konsiderá un transakshon asina komo sospechoso. Den un kaso asina ta traspasá e transakshon pa e outoridatnan ku ta enkargá ku investigashon i persekushon. A stipulá e indikadónan nesesario den e asina yamá “Beschikking indicatoren ongebruikelijke transacties”. 

Seshon informativo

E hefe di MOT a bisa LA PRENSA, ku entretantu a tene un promé seshon informativo ku e grupo di ‘melders-nan’ nobo. E promé seshon tabata pa prepará e profeshonalnan ku ta forma parti dje sektor aki.

Otro luna MOT ta bolbe organisá un seshon di informashon pa e gruponan nobo ku mester mèldu. Entre otro ta bai  informá e grupo kiko ta enserá e obligashon di raportá i kon pa traha ku e indikadónan. Segun e splikashon di Dambruck lo tene e seshonnan di informashon pa kada sektor òf gruponan di sektor. Durante dje seshonnan di informashon lo indiká entre otro e uso di e indikadónan i lo presentá e normanan relevante.

LA PRENSA a konkluí for dje splikashon dje hefe di MOT, ku den kada sektor tin indikadó ku ta yuda e ‘meldersnan’ pa detektá, pa den nan sektor ki ora e tin di haber ku un transkashon no-usual. “Lo usa un par di ehèmpel. Tambe nos ta splika e liñanan di indikashon ku por yuda e ‘meldersnan’ deskubrí e transakshonnan no-usual ku nan ta konfrontá den nan sektor”, Dambruck a sigui splika.

Durante dje seshonnan di otro luna, funshonarionan di MOT ta konsentrá mas konkreto riba kada sektor. Durante dje  promé rònt di informashon e indikadónan no tabata konosí ainda.

“Entretantu pa e grupo nobo aki, e indikadónan tambe a drenta vigor i e meldersnan ta haña splikashon kon traha ku nan”, e hefe di MOT a menshoná. 

Screening severo

Na novèmber awor Kòrsou i Sint Maarten ta risibí bishita di miembronan di Financial Action Task Force. Meta di e bishita aki ta pa someté e dos islanan aki na un screening severo pa determiná si nan ta kumpli ku e kuarenta rekomendashonnan pa kombatí labamentu di plaka i tambe ku e 9 rekomendashonnan spesial pa kombatí finansiamentu di terorismo.

Kenneth Dambruck a bisa LA PRENSA ku e funshonarionan internashonal ta keda dos siman na Kòrsou i Sint Maarten. Durante di nan estadia ta posibel ku nan ta bishitá entre otro Banko Sentral i Gaming Control Board. Tambe e ofisina di MOT i algun instansia ku tin obligashon di raportá, por fèrwagt un bishita dje ekspertonan aki.

Mas aleu e hefe di MOT a bisa, ku pa loke ta e instansianan ku por risibí un bishita, ta inkluí esnan ku mester a raportá for di ántes komo esnan nobo.

“Nan por papia tambe ku polis, Prokurador General i Fiskal”. Ta keda na e funshonarionan pa disidí ku ken nan ta papia pa haña e informashon si nan ta kumpli”, segun Kenneth Dambruck.

Pa kada grupo ta konta ku sierto dje rekomendashonnan. E funshonarionan di FATF durante nan estadia na Antia, lo evaluá si  kada grupo ta kumpli ku e rekomendashonnan.

Dambruck: ”Ta trata di un  evaluashon hopi serio. Si nos sali malu for di dje, e ta afektá nos”. Riba e pregunta kiko  e konsekuensianan por ta pa Antia, den kaso ku e kòntròl resultá negativo, Dambruck a splika: ”Dependé kon malu bo sali. E organisashon por pone nos bou di un sorto di kuratela”.

Esaki ta nifiká segun e funshonario di MOT, ku Kòrsou i Sint Maarten lo ta menshoná den e asina yamá “ internet revieuw group”. Durante un sierto kantidat di tempu lo kontrolá si Antia ta kumpli ku loke a bai malu durante dje screening. Despues ta sigui un di dos término di kòntròl. Si den e kaso aki atrobe Antia sali malu, ta registr’é riba e lista titulá komo: “Non-Compliment Country and Territory List”. Esei ta nifiká ku  FATF ta kuminsá publiká internashonalmente ku Antia ta labadó di plaka i òf ta finansiá aktonan di terorismo.

“Ta p’esei mester realisá, ku ta trata aki di un kos hopi serio i ta nesesario pa e gruponan nobo ku no sa ainda  muchu  kon pa atendé ku e proseso di mèldu ta bon prepará”.

Den kuadro dje dunamentu di informashon, MOT ta preparando tambe un dia di training pa kompanianan di seguro. Esaki ta nesesario, pasobra ántes ta kompanianan di seguro ku ta bende seguro di bida so tabata obligá pa mèldu transakshonnan no-usual, pero entretantu e obligashon ta bálido pa tur kompania di seguro.

En konekshon ku e deber di mèldu dje sektornan konserní, MOT ta urgí pa nan registrá na MOT, den kaso ku ainda esaki no a tuma lugá. Ta posibel pa registrá dor di yena i manda formulario ku ta disponibel riba e página web: http:/toezicht.mot.an. Pa pregunta òf informashon adishonal por yama MOT na number di telefòn: 462.65.88.