Ta kuminsá ku deseá un i tur un bon dia. Apesar ku instinto ta preshoná hende pa akshon reakshonario (den defensa di entre otro imágen,) e ser humano ta distinguí su mes for di e animal pa e fakultat pa rasoná. E ser mas evolushoná no ta ignorá sealnan instintivo, pero ta interpretá nan den informashon pa por rasoná mihó i mas lihé. Sigur esnan enkargá ku direkshon di un organisashon òf proseso, mester desaroyá i mehorá e kapasidat pa usa e preshon instintivo komo un informashon den nan proseso di rasonamentu.

Hopi aktor polítiko a bini ta reflehá mas akshonamentu reakshonario ku rashonal. Kestion di aktor polítiko ku ta drenta den diskushon ku prensa (pió ainda krea situashon di konflikto personal) durante un kontienda elektoral, no por ta nada otro ku falta di kòntròl riba impulsonan instintivo. Otro ta reakshoná den kuadro di e fenómeno di “denial” kaminda instintivamente ke “target” un mensahero komo enemigu ku mester wòrdu neutralisá. Otronan ta “target” un èks kara di partido en bes di keda gradesido pa e kontribushon realisá.

****

Posishon di poder inevitablemente ta kondusí na un postura (“houding”) i sierto manera di manifestá (“optreden”) ku ta ser pèrsibí (“onderkent”) i eksperensiá (“beleven”) diferente dor di e aktornan den posishon di poder i otronan. Miéntras e aktornan ta pretendé ku ta kestion di konfiansa, saber i visualisashon, e otronan ta pensa den konseptonan manera idea, pretenshon di superioridat (“eigen dunk, verbeelding, overmoed, pretentie”), etc, etc.

****

Ora bo ta den un kategoria di poder, bo akshonamentu mester ta sufisiente kuidadoso (“zorgvuldig”)  den preparashon i kouteloso (“voorzichtig”) den ehekushon ku bo no ta krea resistensia dor di e inevitabel persepshon ku posishon di poder ta karga di maluso di poder i prepotensia (“overschatting en overmoed”). Hende tin e tendensia di resistí kontra di lokual nan ta pèrsibí komo arogansia. Ami ta djis un studioso i no ta partisipá na ponementu di seyo, pero tampoko no ta keda sin hasi un opservashon pasobra e ékis aktor ta sensitivo pa e opservashon.

****

Den e elekshon di ougùstùs próksimo, no tin ningun “issue” ku un òf otro partisipante elektoral a profilá kuné (den sentido ku e tema ta ser identifiká komo kousa dje aktor) ku ta krea un ola emoshonal pa influensiá elektorado den un forma signifikante. E kestion estatal i otro asuntunan relashoná ku e asuntu, ta biba serka “de politiek” pero no serka e masa i sigur no serka e definidornan di elekshon ku ta e votadónan barbulètè (nan ta bula di partido pa partido).

****

Den un situashon asina, historia ta mustra, ku e manera ku ékis aktor ta manifestá su mes (no seyo ku ékis ta pone, pero e persepshon ku aktornan ta provoká), ta haña mas peso ku e kontenido di eventual mensahenan (pretenshonnan di gobernashon òf promesanan elektoral). Na momentu ku ékis persepshon a haña forma, tur pero tur akshon di e determinado aktor ta ser interpretá den e kuadro ei.

****

Al final dje kolumna di entrada pa e siman aki, mi ke apuntá, ku resultadonan optené den pasado únikamente ta sirbi komo fuente di eksperensia, pero hamas i nunka komo garantia pa resultado den futuro. Regla den tendensia di komportashon humano ta bisa, ku di esnan ku a gana den pasado hopi mas ta ser fèrwagt ku di esnan ku tabata ménos fortuná. Ta e grandi tin kos pa pèrdè. Te mester ta mas kouteloso i kuidadoso den su akshonamentu.  

****

Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bon biní.