Lorito ta yama tur hende un felis djaluna. Mondi tabata intrankil den fin di siman. Paranan tabata bula bai bin, pasobra nunka nan no sa haña bishita polítiko den un aña. E aña aki ta di dos bes ku nan ta haña bishita polítiko kaba. Un di nan a bisa duru i nos a tendé grita: Esaki si ta di mas! Lorito a hasi manera e no a tende!

****

Na Sint Maarten nos a tuma not

****

Si nos trèk un liña na Kòrsou ta mesun dilema tin aki. No tin diskushon ku PAR i su lider Emily de Jongh-Elhage ta profilá pa tin signatura di e próksimo Gobièrnu, pero no ta tur kos ta sigur den bida. Prinsipalmente e sosionan di koalishon ta pinta di lo bai tin un presentashon suak, entre otro pa falta di fondo. Esei lo pone preshon riba PAR pa saka lo máksimo, pasobra un aliansa di oposishon lo por pone PAR un banda. Ya kaba Helmin Wiels a anunsiá komo úniko partido ku e lo no traha ku PAR. Ademas Wiels ta pretendé di ta e yabi di e próksimo formashon, opviamente no e yabi hel pa habri e kas bèrdè ku PAR ta propagá.

****

Nos sintí a bai hopi den e último dianan riba Betico Croes ku a lucha asina tantu pa status outónomo di su pais den reino, pero finalmente a pèrdè elekshon pa motibu di maneho di asuntunan importante di e pais ku su Gobièrnu a neglishá. Ora ku Betico di felis memoria a kere ku e lo haña mandato pa drenta e pais nobo, pasobra a logra status outónomo, medidanan ku su BC a tuma e tempu ei, a resultá den un kastigu formal. Lorito ta skibi e kos aki pa hende no konfia masha ku tur kos ta outomátiko. Nos a mira ku tin yen di hende demasiado konfiá i e votadó di awendia no ta kèns mas!

****

Biniendo bèk riba Sint Maarten, ta interesante pa nota ku un grupo grandi di Yu di Kòrsou di bon formashon, entre nan hopi polis, a asosiá ku Heyliger. Nos a mira ku Richard Panneflek, yu di Kòrsou legítimo, hefe di polis, a bira parti di e partido di Heyliger. Richard a presentá su kandidatura komo minister di Hustisia di pais Sint Maarten ku su lema “UP with Richard, elect Richard Panneflek for Justice for all”.

****

Lorito a haña den su pòstbùs den mondi dokumentunan ku ta mustra ku tin un otro Credit Card-gate na kaminda (no esun aya!). Nos ta kuminsá manda tur e dokumentunan pa nos amigu Helmin ku ta gusta eksponé gatenan (salbo esun aya!) pa nos tende di su análisis. Kon un hende por pretendé di hasi uso di un credit card ku su kompania a konfi’é ku ne di e forma aki, ta Dios so sa!

****

Nos a pensa masha riba Safira de Wit ku ta bai eksponé nos isla den un foro internashonal di Miss Universe sin masha sèn. Ku Safira di tur manera, sea elihí òf no, Kòrsou lo haña garantisá un bon eksposishon. Ora nos mira loke Safira mester na fondo pa pone Kòrsou riba mapa internashonal i loke nos a gasta na Cuba (mas ku 250 mil florin and still counting...!), nos ta puntra nos mes unda nos prioridatnan ta. Ku Cuba te ainda nos ta konvensí ku nos lo no gana apsolutamente nada ku no ta e outo-satisfakshon kultural di sierto grupo. Ku Safira nos tur ta gana! ¡P’a que lo sepas!

****

Lorito ta bula limpi bai promé nos haña un mèp awe ku lo spat algun ala for di nos. Papiadó di bèrdat ta haña kouchi pa nan ten’é será den dje. Te mañan ku Dios su poder!