WILLEMSTAD – E motibu prinsipal ku e profeshonal den komunikashon i presentadó di programa radial Phyllis Hernandez a djòin filanan di partido Democraat ta, pasobra e por a identifiká ku e partido ku ta ofresé un polítika diferente, asina el a duna di konosé na LA PRENSA. Algun dia promé ku entrega di lista a puntra sra. Hernandez, si e kier subi lista i a pidi pa kòmbersá ku lider polítiko Norberto Ribeiro.

Riba e pregunta si por keda imparsial, teniendo kuenta ku e programa radial sra. Hernandez a bisa ku tur kos ta dependé di bo mes den asuntu aki di imparsialidat. Den pasado sra. Hernandez a kritiká hendenan den prensa ku a asosiá ku polítika severamente, pero awor e mes a drenta e boto polítiko. Sra. Hernandez ta bisa, ku siendo un persona hopi skèrpi, semper el a vosifera lo korekto i a yama tur kos na nan nòmber. Partidonan ku e por identifiká su mes kuné el a vota pa nan den pasado.

Ta di dos biaha ku e ta públikamente ku DP, pasobra na 1977 el a kampaña pa Boy Rozendal na momento ku a hasi un apelashon riba dje; e aña ei DP a sali viktorioso. Awor ku pa di dos biaha a djòin e filanan, ta promé biaha  ku el a subi un lista polítiko, Hernandez a sigui bisa. E mes tabata kier keda mas neutral posibel, ounke e no a haña un definishon satisfaktorio pa e término. “Hende mester tin posishon den bida, mester por bisa kiko bo ta para p’e, kua ta bo punto di bista, vishon etc. Sigur lo mi ta kritiko ku partido DP mes. Nan sa tambe kon mi ta pensa”, asina e polítiko nobo a bisa.

“Mi posishon riba Staatsregeling a sorprendé algun, pasobra a label mi despues di a hasi programanan di grupo No komo profeshonal. Semper e ta bisa su pensamentu riba loke ta korekto o inkorekto. Den henter e trayekto di struktura estatal den su programa radial  a menshoná e partinan bon i ménos bon di esaki; esaki ta konta tambe pa leinan di konsenso ku el a bisa ku e parti finansiero ta bon, pero e parti hurídiko no. Hende mester siña relativá i no hinkami den un bòks. Mi ta sali tòg. Henter e asuntu di referèndem a pasa kaba, awor ta bayendo elekshon, pues mester stòp di pensa den bòks i mira kiko por saka lo mihó for di loke tin riba mesa. Interes general ta konta pa Hernandez meskos ku partido DP. “Laga nos balansá loke ku tin”.

Leinan di konsenso a keda aseptá, awor mester aseptá Staatsregeling. DP no ta kompletamente di akuerdo ku loke tin. “Na momentu ku rechasá esaki, mester ta bon pa bisa kiko ta bai pasa, kiko ta bira e posishon di Kòrsou. Ta bon pa sali splika esaki. DP ta bai pro e Staatsregeling ounke kier mira sierto ahustenan ku lo hasi den promé reunion di parlamento. No ta benta un outo afó ku ta traha pa 80%”, esei ta e pensamentu di Hernandez riba e tópiko aki. Esei ta su posishon; nos a yega bastante leu i tur hende kier sali for di Antia. Mester wak ki konsekuensia esaki tin pa Kòrsou si no aseptá e Staatsregeling, ku no ta forma un peliger pa estado. DP ta dispuesto pa sinta ku tur partido na mesa na momentu ku haña representashon i mester bai forma un koalishon”, asina Hernandez a bisa finalmente.