WILLEMSTAD –  Mando  di Polis ta pèrsistí pa kita dos polisnan den e kaso Van der Kouwe na Boneiru, no opstante ku Korte a bisa ku nan no ta “disfushonal”. Miéntras tantu awe mainta, despues di hopi tempu tabatin un akshon atrobe di un sekshon di Kuerpo di Polis. Personal di Technische Opsporingsdienst (TOD) a tene un walk-ou

No tabata posibel haña sa di Bònt di Polis (NAPB) ta kiko ta pasando den e kaso aki. E presidente di Bònt di Polis ta na Boneiru. Informashonnan ku LA PRENSA tin ta hasi menshon ku mayoria di e trahadónan di TOD aparentemente a afiliá últimamente ku e bònt nobo SAP.

Boneiru

Miéntras tantu un delegashon di Bònt di Polis ta reuniendo na Boneiru ku hefatura di polis, despues ku a bira konosí ku Kuerpo di Polis di Boneiru kier deshasí di dos polisnan ku a haña un sanshon relashoná ku e kaso Marlies van der Kouwe. Manera ta konosí, den e kaso aki tabatin informashon ku  e dos polisnan tabata  negligente den e promé oranan di e kaso. Ta mas ku 24 ora despues di desaparishon di Van der Kouwe a bati alarma. Korte a dikta ku no por retirá e dos polisnan aki. No opstante esei, e hefe nobo di Kuerpo di Polis di Boneiru lo kier retirá nan for di nan posishon, algu ku Bònt di Polis ta bringando ku tur forsa. E sindikato ta alegá ku ta e hefe di Polis di Boneiru e tempu ei John Schagen, ta esun ku mester karga responsabilidat na promé lugá. Ta mando di polis mester a sòru pa tabatin sufisiente polis na Warda di Polis, segun Bònt di Polis ta alegá. No opstante e argumentunan aki, e hefe nobo ta riba e trayekto pa retirá e dos polisnan aki. Awe mainta tabatin un reunion urgente pa atendé e situashon na Boneiru.

Bònt di Polis ta haña, ku e veredikto di korte den e  kaso aki tabata masha kla. Korte a dikta ku no por bisa ku e dos brigadirnan no tabata funshoná. Esei nunka a sali na kla.  E sekshon di polis ku ta investigá polis BIR (Boneiru) a konstatá, ku e dos polisnan no tabata funshoná, argumentu ku korte a pone un banda. Na Boneiru tin e impreshon, ku tin mannan tras d kortina ta pusha pa retirá e dos polisnan aki, pa motibu ku e víktima tabata un ulandes oropeo.

Intentonan pa haña un komentario di Bònt di Polis riba e kaso aki, no a duna resultado awe mainta, komo ku e reunion tabata tumando lugá.