WILLEMSTAD - “Ta sumamente ridíkulo pa insinuá ku paisnan chikitu manera Antia i Aruba ta ko-responsabel pa e krísis finansiero mundial manera parlamentario Van Raak (SP) a deklará den fin di siman,” asina sekretario di Estado pa Asuntunan Finansiero Alex Rosaria a duna di konosé na LA PRENSA.

Segun e sekretario di Estado ta ridíkulo ku paisnan chikí den Karibe, inkluyendo Antia i Aruba por ta responsabel pa e krísis mundial. E personanan ku ta bisa algu asina no ta komprondé kon ekonomia ta hinká den otro. Ta meskos ku bisa ku islanan ta responsabel pa e problema di ozon ku ta asotando mundu.

“Tur pais tabatin su granito den esaki, pero no por t’asina ku islanan chikí por tin influensia di tal índole ku ta afektá i asta ta kulpabel pa krísis finansiero mundial.”

Van Raak a bisa ku e sistema di bentahanan di impuesto i otro areglonan fiskal na Antia i Aruba ta ko-responsabel pa e krísis di krédito mundial i e no ta aprobá ku a kita Antia i Aruba for di e lista pretu di paraisonan di impuesto. Ademas t’asina ku a pasa di lista pretu pa shinishi di e Organisashon di Koperashon i Desaroyo Ekonómiko ta un formalidat, no ta hasi diferensia. Banda di Antia i Aruba paisnan oropeo manera Bèlgika, Luxemburg i Zwitserland tambe ta aparesé riba e lista shinishi.

Van Raak a bisa mas aleu ku Antia i Aruba mester a keda riba lista pretu. Riba esaki Rosaria a komentá ku tin sierto hende na Ulanda ku semper ta trata na bruha nos agènda i nos mester evitá ku ora bo ta riba un kaminda pa yega na sierto meta di desviá atenshon i tempu na reakshoná riba e polítikonan ulandes aki, ta tempu pèrdí. “Nos meta ta pa nos sigui traha kumplimentu pa kita for di lista pretu bai  shinishi bai blanku. Pa van Raak no ta aseptabel ku kompanianan multinashonal no ta paga belasting na e islanan. Asina no por invertí den Enseñansa, Salubridat i kombatimentu di pobresa.”

Rosaria ta indiká tambe ku for di añanan 90 nos a kuminsá pensa di kita di e sistema di paraiso di belasting i bai kumpli ku reglanan di transparensia ku mundialmente tabata birando e norma. Na aña 2000 nos pais a duna su palabrá na OECD di lo komprometé su mes na e trayekto pa eliminá práktikanan fiskal dañino.

Na 2001 a introdusí e asina yamá Kuadro Fiskal Nobo (NFR). Ku NFR nos pais a pone un paso pa kompetí global a base di reglanan akseptabel internashonalmente.

Banda di reglamentashon internashonal, Antia a invertí hopi den salbaguardiá interesnan di e institutonan finansiero i e konsumidó.

Ta bai papia direktamente ku OECD kiko ta e kondishonnan pa kumpli kuné pa ta riba lista blanku. Tur otro hende pafó di Antia mester respetá ku asuntunan finansiero i di ekonomia antiano ta asuntunan outónomo. “No tin ningun kuenta di duna Ulanda i Parlamento ni parlamentario ulandes,” asina Rosaria a konkluí.