WILLEMSTAD -  Minister di Tráfiko i Komunikashon, Maurice Adriaens, no tin nada kontra di un eventual investigashon relashoná ku akusashonnan di Hetty van Rossum enkuanto e maneho di Postspaarbank. Ademas, minister Adriaens i Postspaarbank ta dispuesto pa duna tur koperashon pa realisá e investigashon aki.

“Pa kuminsá, mi mester bisa, ku mi ta habrí pa kualke investigashon por tuma lugá, pasobra ami ku Postspaarbank ta habrí pa papia ku tur hende i habri t

Ta p’esei, segun e minister, e no tin problema ku ningun investigashon. ‘Pasobra esaki lo trese klaridat den un kaso ku ta hopi kompliká’.

Lamento

Minister Adriaens ta lamentá sinembargo, ku un abogado ku ta den funshon di  Raad van Toezicht, mester bai prensa ku e asuntu aki. Adriaens: ”Pasobra si for di novèmber ami a informá van Rossum di e akto ku lo wòrdu firmá dia 11 di novèmber, e no a reakshoná mashá. Pero tabata te desèmber numa van Rossum a sali for di partido i el a warda te na mitar di yanüari pa kuminsá hasi bochincha riba e issue aki, Adriaens a remarká.

E miembro di Frente Obrero Liberashon 30 di Mei a bisa ku van Rossum mester a tene e asuntu aki trankil i aserká e instansianan konserní.

Den un situashon asina aki, segun Adriaens e problemátika di van Rossum por a wòrdu atendé pa e instansianan ku e por a aserká na un manera mas konfidensial, pasobra ta trata di un banko ku ta disponé informashonnan privá di su klientenan. E instansianan konserní na nan turno lo por a hasi e investigashonnan nesesario sin ku mesora mester a buska problema den publisidat.

Adriaens: ”Komo abogado bo ta traha ku dokumentonan ku bo ta haña serka klientenan i un kliente  no ta fèrwagt ku un abogado dia ku e rabia ku bo, e ta kue su informashonnan  i manda nan pa medionan di komunikashon den bo pais”. Segun Adriaens, ta trata aki di un situashon inkorekto di aktua pa un abogado.’ Mi tin problema ku e sistema’.

Dikon e kompra

Minister Adriaens a splika tambe e motibu dikon Postspaarbank a kumpra Easy Pay (Telefásil).

Mester komprondé kiko ta e sistema di Pagafásil, segun Adriaens. “E ta un sistema unda ku bo por paga i hasi transakshonnan den tienda, entre otro un pòmp di gasolin, drugstore òf supermerkado. Pa medio dje sistema por paga entre otro Aqualectra, UTS, Selikor i den futuro bùtnan tambe”. Ta trata di un fasilidat pa e konsumidónan.

Postspaarbank ta den proseso pa bira un banko ofisial. Pero ainda e no tin un sistema manera otro bankonan tin den forma dje mashinnan di plaka pafó pa hasi sierto transakshon, entre otro lanta sèn.

Pagafásil ta representá un sistema, ku básikamente  por hasi tur e aktividatnan aki i ku ta na benta pa un bon preis den e konsepto di gobièrnu, segun Adriaens.

Promé ku a tuma e paso di kompra, gobièrnu a laga SOAB hasi un investigashon riba e empresa pa determiná si e tin mas debe i pa haña un bista riba e balor di e kompania. A base di e rapòrt di SOAB, gobièrnu a yega na un preis realisabel. “E preis ta bin hopi serka di e totalidat na debe ku e kompania tin na diferente instansia, entre otro serka un otro banko ku ta manera un partner den e kompania”.

2.8 Mion dollar

Refiriendo na e suma di kompra di Pagafásil, Adriaens a remarká, ku e kompania a wòrdu kumprá pa 2.8 mion florin. E menshon dje suma den dollar, segun Adriaens, ta un fayo di tik, pa kua el a rabia masha tantu mes ku e direktor di Postspaarbank pe. “Pasobra mi ta haña ku e tipo di transakshonnan asina aki bo no por hasi un fout den menshon di dollar pa florin”.