WILLEMSTAD -  “Esei ta bida”! Asina Omayra Leeflang, lider di kampaña di partido PAR, a bisa relashoná ku e reklamo di Juniel ‘Araña’ Adelina, ku PAR ta usa su imágen den un propaganda na televishon.

Den e spòt di PAR  ku a kuminsá pasa djadumingu na televishon, por mira Araña den propaganda ku ántes el a graba pa PAR.

“Despues di a traha di serka ku e personahenan ku ta spònser i traha pa pusha sierto pensamentunan den mi pueblo di parti Partido PAR, ami Juniel Adelina konosí komo “Araña” a realisá un anochi, tendiendo un kombersashon di e pèrsonanan aki ku tur kos ta drei rondó di nan probecho personal, ta p’esei ami a uni mi mes na pensamentu i tambe ku konvikshon p’ami purba remediá mi eskogensia robes di pasado”.

Mas aleu Juniel Adelina ta splika, ku ta pasobra e tabatin  nesesidat i komo persona ku gana di forma parti di e profeshonalnan den e arte di aktuashon, el a  kere ku dor di a aseptá e trabou aki na 2007 i tambe den referèndem di 2009  lo a dun’é e pas i trankilidat pa su kas i famia, pero esaki no tabata e kaso”.

Desaprobá

Juniel ‘Araña’ Adelina,  p’esei ta desaprobá i repudiá e hecho ku na 2010 e mesun Partido PAR aki ta  usa su imágennan reeditá den spòtnan na televishon ku en todo kaso no ta karga su aprobashon.

“Mi ta spera ku esaki a trese klaridat na mi pueblo i ku nan ta konvensí despues di esaki ku ami ta ku Lista di Kambio i ku mi imágen en todo kaso ta wòrdu usá dor di PAR sin ta karga mi aprobashon”.

Un hende ku traha un kampaña òf un propaganda, mester realisá ku e material ta propiedat di e organisashon. Omayra Leeflang komentando riba e reakshon di Adelina ta bisa, ku e propagandanan trahá riba instrukshon dje partido polítiko en kuestion por wòrdu usá. “Òf bo mester a sera un kontrakt den kua tin stipulá, ku no ta permití pa usa e propaganda en kuestion”. E lider di kampaña dje partido gel, a referí na e kaso unda ku a kué i usa imágen di Tony Castro (PAR) i repartié, miéntras ku ta trata di un asuntu ku a tuma lugá promé ku Castro a subi lista di PAR.

“Juniel Adelina no tin un kontrakt ku PAR i esei ta pone ku e spòt ta propiedat di esun ku pag’é”, Leeflang a enfatisá.  E miembro di PAR a sigui bisa: ”Ta tur hende mester realisá, ku ora ku e ta traha propaganda e  mester tin norma”.  

Leeflang ta konvensí, ku Lista di Kambio a skohe ‘Araña” pa demostrá ku e ta pa nan. “Awèl ta p’esei awor nos ta demostrá, ku un tempu hòmber Araña tabata pa nos”.

Di su banda Juniel Adelina ta opiná, ku ta imposibel ku hende i prinsipalmente esnan ku mester ta ehèmpel den e tipo di funshonnan di gobernantenan di pais, ta pèrmití nan mes di usa mi imágen pa trata di konfundí nos pueblo di Kòrsou despues ku mi ta trahando i kampañando pa un kambio positivo den mi pais Kòrsou.

“Ami, Juniel Adelina, alias “Araña”, ta kompletamente ku e kambio, mi pais meresé mihó maneho i mi ta skohe pa bienestar real i no esun temporal”.