WILLEMSTAD – E movementu polítiko nobo ku Alex Rosaria i Mike Franco lo traha riba dje, lo no konta ku sosten aktivo di Eugène Rhuggenaath. Rhuggenaath a kaba di ha�

E siman aki Rosaria (eks-Nashonal) i Franco (eks-PAR) a anunsiá, ku nan ta sali for di direktiva di Fundashon Empoderá Kòrsou (FEK), pa kuminsá ku e proseso pa lanta un partido polítiko nobo. E partido lo partisipá na e elekshonnan pa Pais Kòrsou, ku lo tuma lugá ku tur probabilidat na yüni awor (si e proseso pa desmantelá Antia sigui). Eugène Rhuggenaath ku a kibra ku PAR, tambe tabata kandidato pa traha riba e movementu polítiko aki, pero pa motibu di su relashon laboral nobo, awor e no por mete ku polítika mas.

Rosaria i Franco a disidí ku nan si ta sigui. Franco a bisa na radio ayera, ku ta bai traha tur ku tin riba e partido nobo. Konsiderando e eksperensia di último lunanan, esei no mester ta un problema mayó, asina Franco a bisa.

Miéntras tantu a hinka miembronan nobo den direktiva di FEK pa asina e fundashon sigui traha riba empoderashon di Kòrsou. Pero e fundashon mes lo no ta enbolbí polítikamente. Riba e pòtrèt por mira parti di e enkuentro ku a tuma lugá e siman aki na Café Santa Rosa, kuna di FEK i aparentemente kuna di e partido nobo.