WILLEMSTAD- “Kua mandatario no ke baha gasolin, pero sin perhudiká e forma ku gobièrnu mester kumpli ku su gastunan”, tabata pregunta ku diputado Humphrey Davelaar ta hasi relashoná ku deklarashon di Gregory Damoen ku a bisa, ku nan si lo baha gasolin ku 30 sèn. Den un komentario di Gregory Damoen

Segun diputado Davelaar ta sigui deklará na LA PRENSA ku mester tene kuenta ku e entrada riba akseins ta yuda paga ònderstant, gastunan médiko i otro responsabilidatnan ku ta hasi ku ta imposibel pa kita e 50% for di akseins. Ademas ora ta duna deklarashon positivo asina, mester tende kuenta ku no ta perhudiká otro obligashonnan ku gobièrnu tin.

E diputado ta amplia pa mustra, ku tin un komishon ta studia e asuntu di akseins kaba i ku mester mira unda ta remplasá e preis di akseins aki den otro forma, kaminda ta kobra mas entrada riba produktonan ku no ta saludabel pa bida di hende. E komishon no a kaba ku nan estudio, pero tin diferente partnernan ta hasi e trabou aki di manera ku por duna gobièrnu un direkshon kua ta e produktonan ku lo por bai konosé un oumento di belasting.

Diputado Davelaar ta splika, ku e polítiko no a amplia den ki forma lo bai yuda gobièrnu kumpli ku su debernan fin di luna, pasobra for di entrada di akseins, salarionan di ámtenarnan tambe mester wòrdu pagá. Pues, ta bira imposibel pa disidí, ku ta asina asina ta kita 50% riba akseins pa logra baha gasolin ku 30 sèn. Tambe mester tene kuenta ku tin presupuesto di akuerdo ku CfT i ku gobièrnu no por lanta hasi loke e ke sin tene kuenta ku palabrashonnan hasí. Pues, no por lanta kita un entrada sin ku no bisa unda bo ta krea entrada pa kumpli ku obligashonnan sin mas.

Pa logra baha akseins, mester sa unda tin otro forma pa sera e burakunan ku bo ta krea den gastunan di ònderstant, karchi di dòkter, salario i otro obligashonnan. Esaki ta bon pa e polítiko splika e pueblo i no papia di baha preis di gasolin ku 30 sèn i baha akseins ku 30%, sin bisa unda ta krea otro forma pa gobièrnu kumpli ku su gastunan mensual.

Finalmente diputado Humphrey Davelaar ta indiká, ku tur bahamentu di preis mester ta di e forma responsabel i no manera ta papia den publisidat.