WILLEMSTAD -  Lider polítiko di Pueblo Soberano ta haña úniko ku parlamentario Glenn Sulvaran (PAR) ta menshoná su nòmber den e lista di delegashon ku a bai Venezuela na 2005 den avion militar siendo ku e tempu ei e no tabata ni den Konseho Insular ni no a partisipá na elekshon te ku 2006.

Pa aklarashon Wiels a bisa, ku ta riba invitashon di gobernador di estado Falcon Hesus Montilla, e delegashon a bai Venezuela pa un interkambio kulturismo i a papia ku presidente di Asamblea Nashonal sr. Maduro. Den e delegashon tabatin sr. Wiels mes den representashon di  Movemento Aliansa Sivil, Anthony Godett di FOL, Errol Cova komo Minister, Charles Cooper (MAN), Joyceline Clemencia (Movementu Independensia) i dos reportero di Amigoe ku a bai pa relatá i dokumentá e bishita, riba invitashon di partidonan polítiko.

Pa loke ta trata e diskushon ku a surgi e dianan aki riba meta di e basenan militar aki na Kòrsou i Aruba, Wiels a bisa ku tin prueba kontudente di otro metanan, pasobra pakiko ta traha bunker, esaki   ta pa prepará pa guera. E basenan militar merikano no ta kombatí trafikashon di droga mes, pasobra na promé lugá nan no a konfiská ni un gram di droga, ta wardakosta di Antia ta interseptá i konfiská droga.

E motibu real ta di su eksistensia ta relashoná ku e supuesto plan Colombia, instituí tempu di presidente Clinton, durante su atministrashon pa supuestamente kombatí narkotráfiko i kultivo di kokaina na Colombia. Na inisio di e plan e kálkulo tabatin 340 akre di kultivo di koka na Colombia, awe sifranan ta mustra ku a bini 340 akre aserka, ku ta un oumento di 100%.

Ta meskos Merka a hasi na Afghanistan kaminda ta produsí heroina (amapola), pasobra esaki ta finansiá Taliban, miéntras 200 mion sivil a muri na Afghanistan. Mientrastantu e kultivo a subi fo’i 2001 ku 400%. Pues e lucha kontra narkotráfiko ta un frakaso total, pasobra konsumo na Merka ta mas grandi na mundu.  Di otro banda si wak sifranan di  Interpol, Venezuela ta na vanguardia di e lucha kontra narkotráfiko. E intenshon aktual ta pa destabilisá e region. Loke ta interseptá entre Colombia i Atlántiko, via Venezuela, tin konfiskashon mas grandi na mundu, asina Wiels a konkluí.