WILLEMSTAD -  “No mester lubidá ku e meta prinsipal pakiko e base militar merikano a bini Kòrsou ta, pa kombatí trafikashon di droga”. Asina presidente di Parlamento Pedro Atacho a duna di konosé relashoná ku tantísimo diskushon ku tin aktualmente riba e basenan FOL i nan propósi

E punto prinsipal ta, ku nos pais mester ta liber di droga, asina e number 3 riba lista di PAR a enfatisá. “Nos mester paga tinu di no kai den e guera di palabra entre Venezuela i Merka, sigur teniendo kuenta ku relashon komersial ku ta estupendo. Mayoria petroli ku Venezuela ta eksportá ta pa Merka, pa kua un di e pòmpnan mas grandi ku ta Citgo ta sòru pa distribushon”, asina e polítiko a bisa.

Na aña 2000 Atacho komo parlamentario huntu ku su kolega Dudley Lucia, kompañá pa konsehero Don Martina, a hiba palabra den reunion públiko di Tweede Kamer pa lobby pa establesementu di e base militar merikano konsiderando e situashon di trafikashon di droga ku a asotá nos pais for di e tempu ei.

Ta hopi importante kiko tabata e motibu real di e base ku ta kombatí  inteligensia kriminal i pa wardakosta tambe evitá, ku e droga ta drenta nos pais i e área di Karibe. Gran mayoria a sostené e lei di Reino i awendia ainda tin un mayoria grandi ku ta sostené e propósito aki, asina Atacho ta bisa.

Mas aleu, Atacho a bisa ku mester paga tinu aki ratu ku oposishon ta usando preteksto ku e base ta daña e situashon geopolítiko pa no usa esaki pa kita wardakosta den region. Mesun wardakosta ku defuntu Vos i Atacho a argumentá di ta krusial den konfiskashon di tonelada di droga ku ta drenta nos pais.

Esnan ku tin protesta mester aserká Minister pa Relashonnan Eksterior Verhagen pa splikashon. Si tin kualke spionahe den área tin sufisiente teknologia moderno pa detektá esaki. Si  dado momentu tin konfirmashon di spionahe mester bini ku prueba pa atendé na e manera korekto, via Reino. Punto ta, ku nos awanan teritorial mester keda liber di droga, asina Atacho a enfatisá.