WILLEMSTAD -  “Nos ta riba e kaminda di kambio den enseñansa i pa loke ta trata Enseñansa di Fundeshi a kana dos trayekto;  e konsepto a kambia, kaminda  punto di salida e mucha haña un formashon segun su kapasidat,” asina diputado Marilyn Alcalá-Wallé a duna di konosé.

Sierto métodonan ku mester a keda traha material na Papiamentu, no a keda kla manera nesesario. Otro puntonan di atenshon tabata lei di Enseñansa di Fundeshi ku ta duna outoridat na direktivanan di skol. Gobièrnu su outoridat ta guia e proseso di pago di sumanan kondishonnan rondó di skolnan.

E outoridat di direktivanan konforme ordenansa di lei di Gobièrnu Sentral a keda reglá asina. Riba e krítika aki, diputado a bisa, ku den kada struktura ku krea tin por i kontra. Tur partido den enseñansa konhuntamente por brinda e kalidat nesesario. Mester wak e retonan i kon pa enfrentá nan. E echo ku ta den kampaña a influensiá e konekshon entre sierto partnernan, asina e diputado a sigui bisa. E pas ku tabatin pa logra kalidat mas lihé posibel, tur kos no ta bai manera mester ta.

Relashon ku diferente partner ta optimal, inkluso ku organisashonnan di mayornan.

Den kampo di Enseñansa tin sierto aktornan, ku di un òf otro manera ta krea un situashon den e sektor. “Ami ta e último persona komo diputado ku tur kos ta bayendo perfekto”. Nos ta riba kaminda i mester enfrentá e retonan i sinta huntu pa solushoná tur e retonan ku tin. Un di nan ta e prueba kordiná ku ta kompletamente nobo. Tur hende mester keda trankil i wak kon ta atendé ku preokupashonnan ku ta biba. Si mayornan ta preokupá, ta algu masha sano mes. RemaUni a keda rekonosé komo e entidat ku ta representá mayornan i a rekonosé nan komo partner. Ora tin problema den Enseñansa, ta sintá ku e grupo aki.

A yega ku partnernan na akuerdo pa un prueba kordiná. Gobièrnu ta garantisá, ku lo tèst e muchanan riba nan konosementu, esta e trayekto ku nan a kana, inkluso lo hasi uso di e relato di enseñansa huntu ku resultadonan di prueba kordiná. No mester bai hasi mayornan nervioso riba esaki sino sinta na mesa. Diputado a sigui bisa, ku semper e ta transparente pa tende tur hende pa huntu traha na kalidat di enseñansa. ETE ta trahando duru riba e prueba kordiná banda di direktivanan, ta trahando riba onderwijskundig rapòrt.

2010 ta aña di kambio kaminda tur hende su énfasis ta riba 10 òktober 2010, no tin tempu pa insultá i kaba ku otro. Mester pone e forsanan huntu pa logra e Kòrsou outónomo ku e base di un pueblo informá i bon eduká. Enseñansa ta un di e pilánan mas importante den realisashon di esaki. E proseso di edukashon ta un di esnan mas importante, asina e diputado a konkluí.