Servisio Ambiental a sera empresa ilegal di resiklá heru na Zeelandia

WILLEMSTAD – Servisio Ambiental a konstatá vários violashon di lei serka e kompania di resiklá ku ta situá na Zeelandia. Esaki a kondusí na siere dje negoshi. Awe mainta funshonarionan di Servisio Ambiental a tene un akshon ora ku a subi e tereno di e kompania di resiklá na Zeelandia i a pone un paro na e aktividatnan ku ta tumando lugá. E representantenan di Servisio Ambiental tabata kompañá pa funshonarionan di SKS i polis. Hefe di Servisio Ambiental, Irving Sillé, a bisa LA PRENSA ku durante dje akshon a deskubrí vários asuntu ku ta kontra di lei. Entre otro a sali na kla ku for di tempu ku e kompania aki ta funshoná nunka e no tabatin un pèrmit pa hasi e tipo di aktividat aki. Tampoko e empresa aki no tin un pèrmit di molèster, miéntras ku nan a tuma nota ku tòg ta sigui ekspandé e negoshi. Sillé ta konfirmá na LA PRENSA ku e situashon ta hopi deplorabel i ku mester hasi un limpiesa intensivo den kaso ku e kompania ke kontinuá ku su aktividatnan. 

Kontroladó antiano maltratá den tram

WILLEMSTAD -  Un kontroladó di tram yu di Kòrsou a risibí herida serio, ora ku el a wòrdu maltratá durante di su trabou. Informashon ku LA PRENSA ta disponé di dje ta indiká, ku e hóben ku ta traha na Den Haag, djaluna último a bira víktima di agreshon, ora ku e, huntu ku su koleganan a haña problema ku sinku pasahero. E agresornan ku tabata den tram 9 a agredí e hòmber di Kòrsou ku konsekuensia ku su milt a skur i el a haña bludumentu interno. E agresornan a trapa i dal e kontroladó. Relashoná ku e kaso aki a detené un hòmber (21) i dos muhé (20  i 21) for di Rotterdam i Diemen. LA PRENSA tin informashon ku e agresornan tambe ta antiano.

A yama radio ayera nochi: Por lo ménos dos prezu ku telefòn selular no opstante medidanan rigoroso!

WILLEMSTAD – Outoridatnan a konstatá ku tin por lo ménos dos prezu ku telefòn selular den Bon Futuro, no opstante e limpiesa rigoroso ku a tene resientemente. Minister di Hustisia Magaly Jacoba ta furioso relashoná ku e último desaroyonan i a eksigí un klaridat di gerensia di Prizòn pa mas tardá awe mainta 10’or.

Na último ora pero tur kos ta reglá: Diputado Alcalá-Wallé a kanselá biahe ku studiantenan pa Ulanda

WILLEMSTAD -  Kontrali na último tres añanan, diputado di Enseñansa no ta kompañá e bekadonan ku ta sali pa Ulanda. Diputado Marilyn Alcalá-Wallé a bisa LA PRENSA, ku ayera tardi el a kanselá su biahe pa Ulanda, ku originalmente e tabatin pa kompañá e promé grupo di 126 studiante ku ta biaha pa Ulanda. “Pa motibunan imprevisto i asuntunan ku ta rekerí mi presensia urgente na Kòrsou”, asina e diputado a motivá e anulashon di su biahe.  Ademas di fungi komo un kompaño pa e studiantenan ku ta bai Ulanda, e meta dje presensia di e diputado riba e buelo último tres añanan tabata, pa ta presente den kaso ku surgi asuntunan urgente pa atendé pa e studiantenan durante dje promé momentu di nan yegada na Ulanda.

No tin abate na Kòrsou: Paisnan di Karibe luchando fuertemente pa kontrarestá dengue

PORT OF SPAIN – Paisnan di Karibe ta luchando tur ku tin pa kontrarestá presensia dia pa dia mas grandi di dengue. Aktualmente tin un brote di kentura di dengue na Tobago, segun Hefe Médiko Nashonal di Trinidad i Tobago dr. Murchison Melville. El a hasi e deklarashon aki durante di un konferensha di prensa ayera na Tobago. Segun Melville, niun hende no a muri ainda di dengue , pero nan statistik ta indiká un oumento di kaso di keintura di dengue. Te awor aki a raportá 159 kaso di kua 55 ta positivo i esei ta nifiká un oumento di 35%. Komparando e sifranan ku aña pasá di 1 di yanüari te ku 25 di yüli 2009, tin un oumento i kasonan ku a keda konfirmá di ta positivo. Segun dr. Melville nan a haña e sifranan último aki den un enkuesta rápido i komo ku  tur no ta konfirmá nan a manda nan pa resultado na Laboratorio Nashonal di Trinidad kaminda por konfirmá si nan ta positivo òf negativo. Nan ta papia di un brote, pasobra e sifranan di e aña aki ta 50% mas haltu ku esnan di aña pasá.

Ta pone hopi énfasis riba meldudónan nobo: MOT ta prepará pa screening severo riba labamentu di plaka

WILLEMSTAD -  Nada no tin mag di bai robes ora ku Financial Action Task Force, FATF,  evaluá Antia (Kòrsou i Sint Maarten) riba labamentu di  plaka i finansiamentu di terorismo. Ta p’esei Meldpunt Ongebruikelijk Transacites (MOT) na un manera hopi intensivo ta informá i instruí e sektornan ku tin obligashon di raportá. Kenneth Dambruck, hefe di MOT a bisa LA PRENSA, ku ta posibel ku tantu e sektornan ku ya kaba tin e obligashon pa raportá komo e sektornan nobo por risibí bishita dje funshonarionan di FATF. Ta p’esei ta importante pa e grupo nobo di sektor ku mester raportá transakshonnan no-usual tambe ta bon informá. 

Grupo nobo 

E último kambionan di e lei ‘Landsverordening melding ongebruikelijke transactries i tambe e lei “Landsverordening identificatie bij dienstverlening” a drenta na vigor dia 15 di mei último. E kambionan di lei aki ta trese kuné, ku for di 15 di mei, tin un grupo nobo ku tin e obligashon pa raportá na MOT. Ta trata di abogado, notario, ofisina di akountent, makelar i bendedónan di outo. Pero tambe konseheronan di impuesto i ofisinanan di atministrashon ta obligá pa lei, pa nan klientenan identifiká nan mes i nan mester raportá transakshonnan no usual na e Sentro pa Raportá transakshonnan no usual.

Na un fundashon di gobièrnu: Datonan di otro kaso di uso indebido di credit card riba kaya!

WILLEMSTAD – Un biaha mas tin un kaso serio di maluso di credit card na kaminda. E biaha aki un biaha mas ta di un fundashon di gobièrnu. Den e kaso aki a paga e sumanan usá bèk ku un chèk di banko di kua tambe ta sirkulando un kopia.  Awe a sirkulá e datonan aki den diferente medio na Kòrsou. Ounke ku e kaso tabata un di kua algun detaye chikí tabata konosí kaba, awor numa envergardura di e kaso a bira konosí. Meskos ku den e otro kasonan di maluso di credit card ku a tuma lugá na CTB a paga bèk, e akto ta keda unu sensurabel. Segun e dokumentunan ku LA PRENSA a optené den e kaso aki, a usa e credit card den forma indebido. Segun e lista, a usa e credit card pa kome na diferente lugá (eksklusivo) na Kòrsou.  Remarkabel ta, ku siendo a kome na e lugánan mas shik di Kòrsou, a bai kome tambe na McDonald’s.

Premiá pa nan partisipashon na Vierdaagse Nijmegen

Detenshon alargá di hòmber armá ku kier a abordá pa Kòrsou na Schiphol

WILEMSTAD – Ta sospechá e hòmber (35) detené djamars na Schiphol, debí na poseshon ilegal di arma, tambe di ta metí den labamentu di plaka i poseshon di droga. Asina e fiskal bosero di hustisia, Maarten Vos a deklará. Durante dje kòntròl di duana a resultá, ku e hòmber ku tabata abordo dje buelo ku tabata na kaminda pa Kòrsou tabata den poseshon di un pistol armá den su yas.  El a wòrdu arestá i awe wes komisario a disidí ku e hòmber di nashonalidat ulandes, bibá na Kòrsou, su detenshon ta prolongá ku 14 dia.

Dokumento

LA PRENSA tin e informashon ku práktikamente tur hende riba e buelo tabata den avion, ora ku a kapitan a anunsiá ku tin un retraso debí na dokumento di sierto pasahero ku mester forma  parti di e buelo. Despues ku e avion a lanta buelo, outoridatnan ulandes a informá, ku a trata di e kaso aki di poseshon di arma di kandela. E detenshon tabatin komo konsekuensia ku mester a baha e ekipahe di e sospechoso for dje avion. Esaki a kousa un tiki retraso den e buelo ku mester a lanta for di Schiphol. Durante prolongashon dje detenshon ku 14 dia wes komisario ta bolbe ta evaluá si e hòmber mester keda será mas tantu dia.  Segun fiskal Vos, te ainda no tin nada konosí enkuanto e estado mental dje hòmber ku a purba pasa ku e arma i artíkulonan prohibí via di Duana. Te ainda ta un pregunta, kon un hende ta pretendé di ta kere di por pasa ku éksito dor dje kòntròl di Duana. 

Personal di TOD a tene walk-out awe mainta; Mando di Polis na Boneiru ta pèrsistí pa kita dos polisnan den e kaso Van der Kouwe!

WILLEMSTAD –  Mando  di Polis ta pèrsistí pa kita dos polisnan den e kaso Van der Kouwe na Boneiru, no opstante ku Korte a bisa ku nan no ta “disfushonal”. Miéntras tantu awe mainta, despues di hopi tempu tabatin un akshon atrobe di un sekshon di Kuerpo di Polis. Personal di Technische Opsporingsdienst (TOD) a tene un walk-out awe mainta pa ekspresá nan disgustu, pa e forma ku kosnan ta bayendo den nan sekshon. Banda di e hecho, ku nan no ta kontentu ku e lugá ku nan lo haña den konstelashon di e Kuerpo di Polis nobo di Kòrsou, e remunerashon ku lo haña a base di e lugá aki, nan no ta kontentu ku diferente punto defisiente den nan entidat. Nan tin ku traha ku material antikuá, no tin kámara pa saka pòtrèt ku ta parti fundamental di nan organisashon i asina tin pida pida kos ku a indusí nan pa drenta akshon.